Die op-en-wakker Birdlife Overberg onder die bekwame le-ding van dr Anton Odendal, bied weer die jaarlikse Flight for Birders identifikasie- en bewaringskursus aan. Die kursus word op 24 en 25 Januarie 2013 in die Omgewingsopleiding-sentrum van Fernkloof Natuurreservaat in Hermanus aangebied.

Kostes beloop R400, wat die kursusmateriaal en sertifikate insluit.

Sowat 1,600 skyfies en tekeninge sal vertoon word en Overberg se opleidingsprojekte sal ook besoek word.

"Die inhoud van die kursusmateriaal en skyfies word elke tweede jaar opdateer, wat pas die geval was," vertel Anton. "Die ontwikkeling van 'n infrastruktuur vir voëlkyk-toeriste sal ook tydens die kursus beklemtoon word." Hy verduidelik dat die kursus veral op die basiese stappe in die identifisering van voëls fokus, asook plekke waar veral skaars en inheemse voëls voorkom en hoe gewone voëlkykers terselfdertyd by bewaring betrokke kan raak. Dit is twee vol dae wat in die program uiteengesit is en die inhoud daarvan spreek van twee baie interessante en leersame dae.

Om te registreer en seker te maak van 'n plek in hierdie gewilde kursus op 24 en 25 Januarie 2013, asook vir enige navrae en die program, kan Elaine by 082-455-8402 geskakel word, of stuur 'n e-pos aan haar by mwjasser@mweb.co.za.