n Jong man wat 4 maande gelede ‘n tref-en-trap ongeluk oorleef het se regterbeen is steeds aan die buitekant gespalk met staalpenne.

Jaco Siegels (21) (regs) was die Sondagmiddag, 4 Oktober 2012, vanaf Duineveldplaas, waar hy ‘n werknemer was, op pad na sy ma in Blompark. “Ek doen uitslaapwerk op die plaas en was die naweek by my ma. Sy het geld nodig gehad vir kos en ek is toe plaas toe om my bankkaart te gaan haal. Op pad terug het ‘n voertuig op die Pearly Beach pad my van agter getref terwyl ek links van die geelstreep gestap het.” Hy is die veld in geslinger en ‘n maat van hom het ook geval, maar is nie beseer nie. ‘n Voertuig se koplig is op die toneel gevind. Die vriend het by die plaas gaan hulp soek en Jaco is later per ambulans na die Provinsiale Hospitaal in Hermanus en is vandaar oorgeplaas na Worcester. Sy onderbeen het op drie plekke gebreek en deur die vel gesteek. Jaco, wat nie werkloosheidversekering van die staat kan eis nie omdat hy slegs twee weke by die plaas gewerk het, sterk tans by sy ma se huis in Leeubekkiestraat  aan. “Die een wat my omgery het moet weet dat ek en die Vader hom vergewe het en dat hy in vrede moet slaap. Ek wens hom ook nie iets slegs op sy pad toe, soos ander mense van my verwag nie,” het die beskeie jong man, Maandag, grootmoedig gesê.                                    

Francois de Jongh