"Flower Valley Early Learning Centre beplan om vanjaar weer aan die 'Walk for Water'-veldtog deel te neem," vertel Marlette Longland, koördineerder van die Gansbaai Eko-skole Projek. Die doel van hierdie veldtog is om die gemeenskap bewus te maak van die belangrikheid van skoon drinkwater.

Sy sê die gedagte is dat elke deelnemer sal besef wat die daaglikse afstand is wat kinders en volwassenes in sekere dele van ons land en oor die wêreld heen moet aflê om skoon drinkwater te bekom. "Ons moedig deelnemers aan om elkeen 'n bottel drinkwater tydens die staptog te dra," sê Marlette. "Daar sal wel iets te drinke halfpad aangebied word." Die staproete sal by Flower Valley Early Learning Centre begin en ook daar eindig. Deelname aan die staptog is gratis, maar Marlette sê donasies sal ingesamel word om te help met projekte waar water aan minderbevoorregte gemeenskappe beskikbaar gestel sal word. Marlette herinner lesers aan Wêreld Water Dag wat vir Vrydag, 22 Maart 2013 bepaal is. Navrae rakende die staptog kan aan Flower Valley Early Learning Centre by elc@flowervalley.co.za gerig word, of Marlette Longland kan by 076-570-7033 geskakel word, of stuur 'n e-pos aan haar by marlette.longland@ocf.org.za. Onthou die belangrike datum: Woensdag, 27 Maart 2013 om 10:00 vanaf Flower Valley Early Learning Centre.    

Hardus Botha