Vlnr: Pieter van der Merwe, Aletta Groenewald en Chris Meyer

"Ek en Aletta Groenewald het gesels oor die vele musiektalente in Gansbaai en omgewing en besluit dat iets daaraan gedoen moet word," vertel Pieter van der Merwe. "Ons gedagtes het in die rigting van 'n Instrumentele Musiekvereniging begin beweeg en dit was nie lank daarna nie, of ons het vir Chris Meyer by ons gewonder betrek." Die stigting van so 'n vereniging op hierdie stadium is egter nie 'n prioriteit by dié drie musikante nie.

"Die gedagte is eerstens om so veel as moontlik mense van Gansbaai en omgewing wat musiekinstrumente kan bespeel, bymekaar te kry om sodoende die belangstelling vir ons idee te toets," vertel Pieter van die Akademie vir Kontemporêre, Jazz & Gospel Musiek van Suid-Afrika (ALMSA).

Aletta is weer bekend vir haar klavierspel tydens die NGK se Baardskeerdersbos Eredienste, terwyl Chris 'n lid van Manie Groenewald se Boereorkes is, asook 'n lid van die Boeremusiekgilde. Hierdie drie musikante versoek alle spelers van musiekintrumente om hulle so gou moontlik te kontak. "Enige musiekinstrumentspeler, hetsy klassieke-, ligte- of boeremusiek, is welkom om ons te kontak," sê Pieter. "Ons verwys ook nie net na professionele musikante nie - inteendeel - daarom is almal wat 'n musiekinstrument kan bespeel, welkom om ons te kontak." Engelssprekendes is vanselfsprekend welkom - musiekinstrumente ken net één taal!

Belangstellendes kan gerus van die volgende kontakbesonderhede gebruik maak: Pieter van der Merwe by 072-390-8084 of almsa@mweb.co.za; Aletta Groenewald by 082-499-0230 of aletta.groenewald@vodamail.co.za; Chris Meyer by 082-499-3086 of gretels@cybersmart.co.za. "Sodra dit blyk dat daar genoegsame belangstelling is, sal ons 'n vergaderdatum bekend maak. Die verloop van daardie byeenkoms sal bepaal of daar voldoende belangstelling vir die stigting van 'n Instrumentele Musiek Vereniging is," sê Pieter.

Hardus Botha