Links voor vlnr is Kaywin May, L-Dre Titus (kaptein met die skild) en Linden van der Walt. Middel vlnr is Austin Phillips, Nolan October, Sharlrique Dreyer en Anton Tobias. Agter vlnr is Sybill October (skoolhoof), Danwill Adams, Asthiaan Hendrick, Cole Warries en Nichol Dreyer (onderwyser en afrigter).

Die Bron Primêr te Stanford het op 27 April aan 'n 7's rugbytoernooi te Curro Privaatskool deelgeneem, waarby 16 skole betrokke was. "Ons het die eerste drie wedstryde ongelukkig naelskraap verloor, maar het steeds goed genoeg gevaar om in die Skild Semi-finaal teen Elim Primêr te speel," vertel Sybill October, skoolhoof van Die Bron Primêr. Sy sê dit was asof hulle spelers "op alle silinders" begin vuur het en hulle klop Elim Primêr gemaklik met 48-0. Daarna moes hulle Laerskool Gansbaai aandurf, "wat 'n tawwe een" was. Maar ook hier sorg Die Bron Primêr vir 'n oorwinning deur Laerskool Gansbaai met 14-0 te klop, waarmee hulle toe die Skildtrofeë trots omhoog kon hou. Die dag se spel en prysoorhandigings gaan op die Supersport 1 TV-kanaal gebeeldsend word. "Die leerders het die dag terdeë geniet en ons is baie trots op hulle," het Sybill gesê. 

Hardus Botha