Die afgelope paar dae was booswigte weer bedrywig gewees, waarvan enkele gevalle hier vermeld word.
Besigheidsroof
'n Winkelhuis in Roosstraat, Blompark is verlede Vrydagaand beroof. Die rower se gesig was met 'n balaklawa (klapmus) bedek en hy het die eienaar met 'n baksteen gedreig. Selfoontyd en kontant ten bedrae van R2,400 is gesteel. Die rower is as 'n baie lang persoon beskryf, ±1,9m. Niemand is nog in hegtenis geneem nie. Enige persoon met inligting kan met sers Crafford by Gansbaai SAPD in verbinding tree. 028-384-0201. 
Pearly Beach
In Pearly Beach het AO Vermeulen en sers Mckay hierdie week die voetspore van 'n vermeende inbreker tot by sy hokhuis in Eluxolweni gevolg. 'n Verdagte, Mzovuyo Mbikanye (26), is met gesteelde goedere in sy besit in hegtenis geneem. Hy word ook met drie ander inbrake gedurende die afgelope maand in Pearly Beach verbind. Mzovuyo het reeds in die Bredasdorphof verskyn. Borgtog word geopponeer.
Roof met vuurwapen
'n Jong seun wat op pad skool toe was, is naby Gansbaai Academia deur 'n rower voorgekeer. Hy is met 'n vuurwapen gedreig en sy selfoon is by hom afgeneem. 'n Verdagte, Presley Robertson (33), is deur konst Marais in hegtenis geneem en het Maandag, 20 Mei 2013 in die hof verskyn, waar borgtog geopponeer is. Die selfoon is steeds vermis.
Otto-moordsaak
Kennis is ontvang dat die Otto-moordsaak, waarby Nuggett Otto met 'n byl doodgekap is, se saak vir verhoor na 1,3 en 4 Oktober vanjaar uitgestel is, nadat 'n nuwe aanklaer deur die Staat aangestel is.                                              
Hardus Botha