Die afgelope week het ‘n onafhanklike konsultant, mnr Jan Palm, wat deur die munisipaliteit aangestel is, aan die omgewingsmoniteringskomitee terugvoer gegee oor die stand van die plaaslike stortingsterrein. Dit het onder voorsitterskap van rdh Pieter Scholtz plaasgevind. Die moniteringskomitee bestaan uit lede van die Wykskomitee.
Die stortingsterrein word jaarliks deur ‘n onafhanklike konsultant ge-oudit om seker te maak dat daar streng by die permit voorwaardes gehou word. Alhoewel die eerste permit wat gedurende 1997 uitgereik is, geen melding van ‘n moniteringskomitee gemaak nie, het die munisipaliteit besluit om dit soos ander stortingsterreine te hanteer, wat onder permitvoorwaardes funksioneer. Tydens die vergadering is ‘n versoek aan mnr Johan van Taak, Bestuurder: Afvaldienste, gerig om die finansiële implikasies vir moontlike uitbreiding van die terrein te ondersoek om sodoende die uiteindelike hoogte van die stortingsterrein te beperk. Die Overstrand is een van min munisipaliteite landswyd wat ‘n permit het vir geldige stortingsterreine. Tydens  die vergadering het rdh Scholtz aangedui dat die munisipaliteit steeds in gesprek is met die Distriksmunisipaliteit om die kwessie rondom Karwyderskraal op te los sodat Overstrand onder andere weer afval daar kan stort ten einde die druk op Gansbaai se terrein te verlig.                                                     
Hardus Botha