Die groep innoverende jongmense wat Gansbaai Explore van DROID bedryf, se suksesse wat tot op datum behaal is, kan as Trots-Gansbaai beskryf word. Sedert die begin van hulle eerste werkswinkel wat aangebied is en tot op datum, het hulle deelnemers geëvalueer en 8 pryse aan die verteenwoordigers van instansies/besighede vir beste vordering oorhandig.

Monica Hayes van Gansbaai Courant verkeer gesellig saam met haar dogter, Michelle

Onder hierdie pryswenners het Monica Hayes van Gansbaai Courant die eerste prys ingepalm: 'n Aandete vir 2 in die Red Indigo Restaurant te Grootbos Natuurreservaat ter waarde van R680.00. Monica het haar dogter, Michelle tydens haar tuisnaweek, saamgeneem, "en ons het dié spesiale ete terdeë geniet," het Monica gesê. Michelle was een van verlede jaar se geskiedkundige "eerste" matrikulante aan Gansbaai Academia. Vanjaar is sy 'n eerstejaarstudent aan Dermatech in Blouberg, waar sy vir 'n kursus in Gesondheid en Velsorg ingeskryf het. Die ander pryswenners is die volgende: Dave Sawtelle van Saxon Lodge (Kis rooiwyn - R300), Stanley Carpenter van Whalesong Lodge (Kis Witwyn - R300), Gill O’Sullivan van Cliff Lodge (Rug- & Nekmassering - R200) en Gina Boysen van Haus Giotto (Advertering op Explore). Die volgende 4 pryswenners het elk 'n PC Call Out geskenkbewys ter waarde van R250 ontvang: Michelle Wcisel van Marine Dynamics, Shalene Pirker van Marebella en Jason Stonehewer van Beach Comber.

Die kriteria waarvolgens die pryse toegeken is, is vir aktiewe en entoesiastiese deelname, leergierigheid en die verwerking van goeie en akkurate inligting, asook foto's, op Gansbaai Explore. "Die primêre doel van hierdie pryse wat toegeken is, is om van ons kant af dankie te sê vir aktiewe deelname aan Gansbaai Explore en ook vir die moeite wat gedoen is om suksesvolle resultate op die webtuiste te behaal," sê Jan Lutzeyer, Besturende Direkteur: DROID, wat vir Gansbaai Explore verantwoordelik is. "Ons beplan gereelde werkswinkels vir die toekoms, waartydens daar telkens pryse ter aanmoediging en dankbetuiging op die spel sal wees," sê Jan. Die primêre doel van die werkswinkels is om deelnemers in te lig, op te lei en om goeie samewerking in hierdie verband te bekom.

Hardus Botha