Hugh-Daniel Grobler met 'n vergrote foto van sy "Branderplankryer" by Gansbaai hawe

‘n Oproep om vir Hugh-Daniel Grobler se foto in Die Burger se Buite Bylae te stem, het gesorg vir ‘n tweede plek vir hom. Daar was 5 senior finaliste waarvoor daar vir die beste foto per sms gestem moes word. Hugh-Daniel het slegs 18 stemme uit die sowat 4,000 stemme gekort om te wen. Sy foto was dié van ‘n branderplankryer langs die ou hawemuur van Gansbaai hawe. Sy prys was ‘n R1,000 geskenkbewys, asook ‘n vergroting van sy foto na ‘n A1. Terselfdertyd het hy ook vir ‘n foto-kompetisie van Rapport ingeskryf. Die tema was poskaart-strandfoto’s en hy het twee foto’s van Uilenkraalsmond se strand ingestuur, waarvan die een ‘n tweede plek gekry het. In hierdie geval was dit nie die publiek wat gestem het nie, maar ‘n paneel van beoordelaars wat die beslissing gevel het. Hugh-Daniel spog reeds met etlike vorige eerste plekke in groot fotokompetisies, soos Die Weg se Foto van die Jaar Kompetise, ZigZag Magazine, Tamron se jaarlikse kompetisie, Shoot to Thrill, Camera Land se maandelikse kompetisie en die Wild Fruit Juice kompetisie. “As ek weer hier kom inloer, sal dit weer oor ‘n eerste plek wees, verseker Hugh-Daniel. Sy besonderse foto’s kan op sy Facebook: HD Photography besigtig word en sy e-posadres is hdgrobler@gmail.com.                                      

Hardus Botha


Die foto van Uilenkraalsmond se strand wat 'n tweede plek aan Hugh-Daniel Grobler besorg het.