AfriForum het onlangs 'n brief aan Eskom gerig waarin hulle aandring dat die elektrisiteitsvoorsiener voëlvrektes moet help voorkom. Dié skrywe volg nadat die gemeenskap van Beaufort-Wes verskeie klagtes by die burgerregte-organisasie ingedien het oor voëls wat in groot getalle deur elektrisiteitskabels doodgeskok word. “Dit is Eskom se verantwoordelikheid om te verseker dat hul praktyke omgewingsvolhoubaar is. Ons vertrou dat hulle met 'n oplossing na vore sal kom om verdere vrektes te verhoed,” het Julius Kleynhans, hoof van omgewingsake by AfriForum, gesê.

Marilize van der Merwe, woordvoerder van die AfriForum Beaufort-Wes-tak vertel dat hulle reeds 6 reuse ooruile, 2 breëkoparende, 19 rooiborsjakkalsvoëls, 4 kraaie en 2 witooievaars onder die slagoffers aangeteken het. "En dit is maar net die gevalle waarvan ons bewus is." Hierdie toedrag van sake raak beslis die res van die land waar ingrype deur Eskom van kardinale belang is en AfriForum is van mening dat Eskom vinnig en daadwerklik sal moet optree. “Die ekologiese balans word deur die vrektes versteur en die langtermyngevolge is onberekenbaar,” het Kleynhans gesê.               
Hardus Botha