Maritha Kriel van Gansbaai se dogter, Annemie Bruce, saam met Johan Stemmet van TV2 se Noot-vir-Noot, tydens die opname van die program

Maritha Kriel, Kassier van die NG-gemeente, se dogter, Annemie Bruce, is môre-aand (Vrydag, 28 Junie 2013) een van Noot-vir-Noot van Johan Stemmet se deelnemers. Tydens die opname van die program etlike maande gelede, het Annemie laat weet dat daar sowat 5,000 persone was wat vir oudisies opgedaag het - net vanuit die Kaap. Sy het die uitslag van die program vroeër vanjaar, na afloop van die opname daarvan, bekendgemaak, maar oor daardie inligting word daar in hierdie berig geswyg. Kyk gerus self môre-aand op TV2 om te sien hoe Annemie gevaar het. Sy is op 19 Mei 1979 in Worcester gebore en het in Caledon grootgeword.

Na matriek het sy Bemarking aan die Stellenbosch Kollege studeer en werk tans as Bemarker vir die Paarl Post. Annemie is met Charl Bruce getroud en Maritha sê: "Daar is nog nie kleinkinders nie - ek wag nog in spanning!" Maritha, wat ook ‘n  koorlid van die NG-gemeente se bekende koor is, sê Annemie was nog altyd gaande oor musiek, maar veral om te sing.

Hardus Botha 

Maritha Kriel (regs) saam met haar dogter, Annemie Bruce