Die St Thomas “Klippieskerk” in Stanford vier die naweek van 19 Julie sy 150ste bestaansjaar, en is een van die oudste kerkies in die Overberg.  Die Anglikaanse kerkie is kort na die totstandkoming van die dorp Stanford (1856) op die markplein opgerig.  Ephraim Moore, wat aanvanklik deur Robert Stanford vanaf Engeland gebring is om die watermeul op sy plaas te vergroot en te bedryf, en sy familie was die grootdryfvere agter die bou van die kerk.  Die kerkie is gebou van plaaslike sandsteen en dekriet en die kerkwerf bestaan uit die kerk self, en die ‘oulap’ skool wat tot in 1983 nog as klaskamers gebruik is.

Aangesien 99% van die kerk se huidige lidmate vanuit die voorheen benadeelde gemeenskap kom (meeste dienste word in Afrikaans gehou!), het Stanford Conservation se Erfeniskomitee in 2008 besluit om die kerk onder sy vlerk te neem en fondse te bekom om die verdere agteruitgang van die gebou te stuit.  In 2009 is fondse vanaf die Roland & Leta Hill Trust bekom en is die kerk opgeknap en heelwat strukturele probleme uitgestryk.

Daar is egter nog heelwat meer wat gedoen moet word.  Die toiletfasiliteite is opgeknap maar glad nie op standaard nie, en die “oulap” skooltjie se rietdak kort aandag.  Om hierdie rede is daar weer besluit om ‘n  fondsinsamelingskonsert op 20 Julie in die kerkie te hou.  Die gewilde A Volonté-groep van Hermanus (Annemarie Joubert, Maike Skein en Hein Attwood) sal verskeie ligte klassieke werke speel, terwyl die plaaslike sopraan, Bea Whittaker, werke van Schubert sal sing – een ‘n  werk met die klarinet as die hoofinstrument.

Kaartjies kos R175p/p en sluit ‘n  vooraf glasie sjerrie en ligte versnaperinge en wyn na afloop van die konsert in.  Verrigtinge begin om 18:00 (6 uur) en kaartjies is beskikbaar by Stanford se Toerismekantoor (028) 341-0340, of vanaf milkwood@maxitec.co.za vir elektroniese kaartjies en betalings.

Bea Whittaker