'n Vakansiehuiseienaar van Riebeek Kasteel, Jannie du Toit, se dogter, Magdelena Terblanche en haar kinders het 'n vreesaanjaende ondervinding in Franskraal gehad. Sy en haar drie kinders van 5, 7 en 10 jaar was op besoek van Vancouver in Kanada en het alleen in die strandhuis gekuier. "Ek het Vrydagoggend om 04:00 wakker geword en gesien dat daar twee mans by my in die kamer was. Ek het doodstil versteen gelê en een het my selfoon langs die bed gevat. Daarna het die twee mans in die huis rondbeweeg. Hulle het later die huis verlaat en ek het opgestaan en deur die venster gesien hoe hulle met gesteelde items wegstap. Hulle was donker aangetrek en ook donker van kleur. Twee van my kinders was by my in die kamer en die oudste in 'n ander slaapkamer," het sy gesê. Magdelena het die paniekknoppie van die sekuriteitstelsel gedruk en beide die sekuriteitsbeampte van Secma en die polisie was gou op die toneel. "My Nikon kamera, waarvoor ek 13 jaar gewag het en kort voor my vakansie gekoop het, en twee selfone is gesteel. Oor die kamera is ek baie hartseer want my vorige ordentlike een is na my wittebrood uit my man se tas op die lughawe gesteel. Nou het ek geen wittebrood foto's nie en is weer my kamera kwyt," het Magdelena gelate gesê. Sy en die kinders gaan weer aan die einde van die maand terug na Kanada waar sy 'n Sondagskoolonderwyser en haar man 'n mynbou-ingenieur is. Sy is net dankbaar dat die inbrekers vir haar en die kinders met rus gelaat het. Die saak word ondersoek en die publiek word gevra om op die uitkyk te wees vir 'n D3200 Nikon kamera wat moontlik te koop aangebied kan word.
Francois de Jongh