Die Birkenhead Animal Rescue Centre, of te wel Gansbaai se BARC soos dié organisasie alom bekendstaan, het verlede week ‘n nuwe Veldwagter, Antonie Jordaan, gekry. Hy vervang vir Phillip Schreck, wat sedert 2010 uitstekende en entoesiastiese diens as BARC se Veldwagter gelewer het. Phillip het onlangs om persoonlike redes bedank.

Antonie Jordaan, BARC se nuwe Veldwagter

Antonie is al vir 25+ jare ‘n Gansbaaier en behoort vir vele Gansbaaiers ‘n bekende gesig te wees. Aanvanklik is hy uit nood gevra om uit te help, maar hy het besluit om permanent betrokke te raak. “Ek weet dat ek die werk as Veldwagter sal geniet, aangesien ek ook baie lief vir diere is,” het hy gesê. Dit gaan steeds goed met BARC, asook met hulle Tweedehandse Winkel, danksy skenkings deur die gemeenskap. Tweedehandse artikels, hoe “oud” ookal, soos veral kombuisware, linne, gordyne, handdoeke, ornamentjies en enige ander snuisterye word deurlopend benodig. Finansiële bydraes ten bate van BARC kan direk in die volgende bankrekening inbetaal word (meld net die donateur se naam, of “anoniem” indien so verkies): BARC - Nedbank Gansbaai - Takkode 196 005 - Rekeningnommer 149 810 3006 - Spaarrekening. “Ons Facebook-blad, “BARC Gansbaai Animal Welfare”, het baie gewild geraak, ook in oorsese lande,” vertel Annalie Jonker van BARC. Vir enige navrae en/of skenkings/donasies kan Annalie by 082-826-0631 geskakel word, of stuur ‘n e-pos aan haar by maynestay@axxess.co.za.

Vir diere-probleme en/of die aanneem van diere, kan Antonie Jordaan (Veldwerker) by 083-742-3903 (onveranderd) geskakel word.

Hardus Botha