Die groot groep Interkerklike vrouens van Blompark voor die Pretoriussaal voordat daar met hulle Vrouemaand-optog begin is

Die koppe het behoorlik verlede Saterdag gedraai toe sowat 70 vrouens van verskillend gemeentes in Blompark by die Pretoriussaal saamgedrom het om met ‘n goedgekeurde optog deur Hoofstraat te begin. Hulle was in mooi pienk T-hemde getooi, met ‘n boodskap van Hoop aan almal. “Hierdie is nie sommer net nog ‘n optog deur die strate nie, ons stap soos gelowiges saam as vrouens met blydskap in ons harte!” Marelize Slinger vertel dat die Interkerklike Susters van Blompark op die optog besluit het aangesien Augustusmaand as Vrouemaand gevier word. “Ons doel was om vroue daarvan bewus te maak dat daar Hoop by Jesus Christus is,” het sy gesê. “Veral vroue wat gebuk gaan onder probleme met dwelmverslaafde kinders moet weet dat Jesus ‘n verskil kan maak.”

Die vrouens het met die sing van lofliedere deur die middedorp tot in Blompark gestap. By verskeie punte het die optog tot stilstand gekom en is getuienisse aan omstanders gelewer. Om 16:00 het hulle die optog by die Nuwe Lewe Pinkster Kerk in Blompark afgesluit. Daar het hulle moeg, maar opgewonde, saamgekuier en sop, broodjies, tee en koek geniet. “Ons bedank graag vir Gansbaai Munisipaliteit vir die nodige toestemming vir die optog, asook vir die veilige verkeersbegeleiding,” sê Marelize. “Dankie ook aan ons borge vir die optog, Great White Shark Tours en White Shark Projects.” Een van die opvallende plakkate het gelui: “Arise women, Arise!”
Hardus Botha