Die skoolbus van Genadendal wat deur ‘n betonheining gebars het, sonder ‘n bestuurder en al luierende

‘n Skoolbus van Genadendal het op Dinsdag, 27 Augustus deur ‘n betonheining in Korporasiestraat gebars…al luierende en sonder ‘n bestuurder. Die bestuurder, Gert Mauries het oorkant Kekkel & Kraai stilgehou om inkopies te doen. “Ek het die bus se enjin laat luier, maar seker gemaak die handrem is stewig opgetrek,” het Gert agterna gesê. Toe hy uit die besigheidsentrum kom, was die bus skoonveld. Dit het rustig en sonder ‘n bestuurder met Korporasiestraat afbeweeg en op die hoek by Dirkie Uysstraat deur die heining van ‘n huis gebars en kort voor die voordeur tot stilstand gekom – met die enjin steeds al luierende en steeds sonder ‘n bestuurder. Gert se gesig was ‘n toonbeeld van verstomming toe hy deur omstanders gewys is waar sy bus is. Die woning word deur Jan Fourie, Vloerbestuurder van Gansbaai Superspar gehuur. Jan is tans met verlof en bevind hom iewers aan die Weskus. Die woning behoort aan Bertie Ramsauer van Dyer Eiland Visserye in Gansbaai hawe, wat onlangs groot skade gehad  het met sy stokvis-treiler, die St Croix, wat in die nuwe hawe deur erge stormweer en –wind losgeruk is en op die rotse beland het. Nou het ‘n bus sonder bestuurder deur sy betonheining gebars.
Hardus Botha