Foto: Alouise Lynch : Dyer Island Conservation Trust (DICT)

“Ons gaan ‘n lewensgrootte draadwalvis in Gansbaai vol rommel maak en die walvis sal voor Gansbaai Toerisme geplaas word,” vertel Alouise Lynch, Operasionele Bestuurder: Dyer Island Conservation Trust (DICT). DICT beplan om die strande vanaf Die Plaat tot by Franskraal gedurende die week skoon te maak en dan eindig hulle met die projek op International Coastal Cleanup Day, 21 September. “As ons nie ons marienelewe beskerm nie, wie sal dit vir ons doen?” Alouise sê daar word jaarliks honderde duisende soogdiere, insluitend miljoene seevoëls, doodgemaak deur rommel in die oseane. “Dit is ons skuld, want sowat 80% van die rommel kom van die land af - van my en van jou, en spoel in ons see in…,” sê sy.

Die gemeenskap word uitgenooi om vanaf 16 tot 21 September te kom help om ‘n verskil aan hierdie toedrag van sake te maak. Kom help die beamptes van DICT om Gansbaai area se strande te gaan skoonmaak - elke dag, vir ‘n hele week lank. Hulle gaan alle plastiekrommel wat op die strande opgetel word, gebruik om die lewensgrootte draadwalvis vol te stop, wat dan voor Gansbaai Toerisme vir ‘n hele week geplaas gaan word vir mense om te sien wat alles van die strande afkomstig is.

“Ons hoop om die walvis teen die 21ste September volgepak te kry,” sê Alouise. Sy bedank graag alle ondersteuners, asook die volgende instansies vir hulle ondersteuning met die veldtog teen rommel: Volkswagen South Africa, Overstrand Munisipaliteit, Gansbaai Toerisme en die Eko-skole.

Kom doen jou deel en skakel die organiseerders by 082-907-5607 of stuur ‘n e-pos aan office@dict.org.za.

Hardus Botha