Vlnr is Gavin Engelbrecht, Piet van Zyl, Jean Downing en Gawie Krugel, met 3 van die 4 snoeke en agter vlnr is Johan Burmeister (weggekruip vir kamera), Salmon Herselman en Elna van Zyl.

Die Birkenheaders se maandelikse boothengelkompetisies is tot dusver behoorlik deur swak weersomstandighede gefnuik. Op 7 September kon daar weer see toe gegaan word, maar aitog…3 bote wat 4 visse na die inweegskaal gebring het. Mooi snoeke, maar net 4. Die 3 bote het ‘n totale aantal bemanningslede van 9 gehad. Net 2 spesies is ingeweeg. Die 4 visse se totale massa was 14.2kg, wat ‘n gemiddeld van 1.58kg per hengelaar beteken.

Met 4 visse is die volledige uitslae nie moeilik bepaalbaar nie: Swaarste vis, Gavin Engelbrecht (Snoek - 4.60kg); 2de Swaarste vis, Johan Burmeister (Snoek - 3.45kg); Swaarste sak, Gavin Engelbrecht (4.60kg, net 1 vir die sak!); 2de Swaarste sak, Johan Burmeister (3.45kg, ook net 1 vir die sak!); Swaarste bootgemiddeld, Relêks 2 van Jean Downing (1.89kg); 2de Swaarste bootgemiddeld, Jaybee 2 van Piet en Elna van Zyl (1.60kg). Die 1ste 3 voorlopers in die onderskeie kategorieë, met weinig verskil van die vorige kompetisie, is: Bootkampioene - Nu-Nu van Johan Burmeister en Gawie Krugel (85.55kg); Jay-Bee 2 van Piet en Elna van Zyl (42.61kg); Relêks 2 van Jean Downing (41.74kg); Mans Visvangkampioene - Johan Burmeister (90.15kg); Gawie Krugel (66.25kg); Phillip Fourie (58.70kg). Dames Visvangkampioen - Elna van Zyl (44.75kg); Dixie Walsh (30.25kg). Gewis ‘n duur kompetisie.

Wedstrydsekretaris, Johan Burmeister, het die volgende berekening gemaak: 3 Bote, 9 bemanningslede, 4 snoeke  (13.9kg) en met 3 bote se kostes op see teen R1,800.00 het die snoekprys na R129.99/kg laat styg. ‘n Rekordprys vir snoek! Ondanks die swak vangstes, is die aandfunksie baie goed bygewoon en kon die gaste met ‘n gesellige aand die “vishartseer” verdryf. Smaaklike bobotie deur Enna Lotz en Elizma de Lange voorberei en met voorsitter Raymond Rabe se Musiekfabriek is daar tot laataand saamgekuier.

Navrae rakende die Birkenhead Boothengelklub kan aan voorsitter Raymond Rabe by 082-928-0594 gerig word, met kompetisienavrae aan wedstrydsekretaris Johan Burmeister by 082-895-7647.

Hardus Botha