Drie mans van die Kaapse Metropool is Maandagoggend in Eluxolweni, Pearly Beach, gearresteer in twee moontlik perlemoenverwante sake wat met mekaar verband hou.
In die eerste voorval het twee mans 'n inwoner by die informele nedersetting uit sy plakkershut ontvoer en na 'n ander hut gedwing. Hulle het hom daar met 'n byl, mes en bofbalkolf vanaf 20:40 tot die volgende oggend om 04:10 aangehou. Hulle het moontlik inligting van hom probeer bekom en is ook vort met R360 kontant.

 Yanga Lenyana, Bafana Qunta en Sifiso Howvza

Die polisie het ook inligting ontvang van 'n derde verdagte wat in dieselfde omgewing met 'n pistool rondloop. Hulle het ondersoek ingestel en Yanga Lenyana is deur 'n polisie-patrollie Maandag om 07:40 op straat gekry. Hy het 'n 9mm pistool met magasyn en drie rondtes in sy besit gehad.
Die polisie het vasgestel dat dié wapen in 1998 in Honeydew, Johannesburg, gesteel is. Die moontlikheid dat Lenyana en die twee rowers, Bafana Qunta en Sifiso Howvza, met mekaar verband hou, word verder ondersoek.                                       
Francois de Jongh