Tertius du Plessis

'n Jong man van Hermanus is gearresteer nadat hy na bewering by 3 huise ingebreek en ook 'n motor gesteel het.
Tertius du Plessis (29) het na bewering Saterdagnag by 'n huis in Kleinbaai en later by Alcatraz, 'n woonstel in De Kelders, toegang deur oop vensters bekom en beursies en kredietkaarte gesteel. In albei gevalle was die inwoners tuis en het tydens die voorvalle niks verdag opgemerk nie.
Die volgende nag is daar by Christenesingel in Franskraal toegang deur 'n oop badkamervenster verkry en 'n skootrekenaar, selfone, juweliersware en 'n motorsleutel is gesteel. Die dief is daarna vort met die eienaar se Honda Civic. Die eienaar het van 'n geluid wakker geword en gesien sy seun se motor is weg. Die plaaslike polisie het omliggende stasies hiervan in kennis gestel.
Polisiebeamptes wat in Stanford op patrollie was, het dadelik laat weet dat hul minute vroeër 'n voertuig wat verdag voorgekom het, afgetrek het. Die voertuig was egter toe nog nie as gesteel aangemeld nie en die bestuurder is laat gaan. Die beamptes het dadelik weer na die verdagte gaan soek en die motor tien minute later in 'n swart woonbuurt opgespoor. Die verdagte is gearresteer en al die gesteelde goedere is in sy besit gevind. Du Plessis was uit op parool vir huisbrake in Hermanus en Korrektiewe Dienste het ook reeds na hom gesoek omdat hy sy blyplek sonder toestemming verlaat het.
Francois de Jongh