‘n Jongman het Saterdagoggend naby die De Kelders afdraai op die R43 in ‘n fratsongeluk gesterf. Die lorrie waarlangs hy tydens die ongeluk gestaan het, is regs agter.

“Toe ek die lorrie se verkoeler oopskroef en dit blaas het Eric geskrik en agteruit reg voor die kar ingespring,” het die lorriebestuurder, Casper Badenhorst, geskok gesê.
Die man wat so tragies in die fratsongeluk gesterf het, Eric Mvelase (27), was ‘n werknemer van mnr Grant Ontong, ‘n houthandelaar van die Strand. Badenhorst was Saterdagoggend om 11:45 met twee werknemers en ‘n vrag braaihout op pad huis toe, toe die voertuig begin warm raak het. Hy het gestop en ‘n gevaardriehoeksteken is langs die pad geplaas. Die masjienkap voor is deur Eric oopgemaak maar daar is besluit om ‘n rukkie te wag voordat die verkoelerkop, wat in die bestuurskajuit is, oopgedraai word. Badenhorst het later besluit dat die voertuig genoegsaam afgekoel het sodat die verkoeler oopgeskroef kon word. Eric het aan die bestuurskant by die venster ingekyk en toe die verkoeler met ‘n blaasgeluid oopgeskroef is, het hy geskrik en teruggedeins. Hy is deur me Roné Martin, wat na Robertson onderweg was, se Toyota Auris getref en het op slag gesterf. Martin wat ongedeerd was, asook Badenhorst en sy passasier was hoogs getraumatiseerd.                      
Francois de Jongh