Hawston Skrik vir Niks kook steeds

Hawston se eerste rugbyspan het Saterdag, 8 Oktober 2022, koning gekraai oor Bredasdorp Rangers RVK toe hulle vir ‘n vyfde keer in ‘n ry (minus die twee Covid-jare) die Overberg-streek van die Boland se Groot Uitdaag gewen het.

Met hierdie oorwinning, het Hawston Skrik vir Niks RVK hul plek in die Top-12 van Boland Rugby se Groot Uitdaagbeker-kampioenskap se klubrugby-kompetisie bespreek. Die Top-12 begin op 22 Oktober en wedstryde sal op SABC 2 uitgesaai word. 

Arnie Africa, raadslid van wyk 8 en die Burgemeesterskomiteelid vir Bestuursdienste, sê die jaarlikse Groot uitdaag-kampioenskap het ‘n belangrike instelling op die Overstrand se rugbykalender geword. 

“Baie geluk en baie sterkte aan Hawston Skrik vir Niks met die volgende rondte van die kompetisie. Dit vra harde werk, ure se oefening en toewyding om 'n wenner te wees. Sterkte met die res van die kompetisie."