25STE L’AGULHAS CLASSIC - ’N MYLPAAL OM TE ONTHOU! 

Wat ’n fantastiese drie dae van rolbal toe L’Agulhas Rolbalklub sy 25ste Jaarlikse Classic van 27-29 Augustus 2026 aangebied het!

Vanjaar het 80 rolbalspelers van regoor die Wes-Kaap, tot so ver as George, deelgeneem in 20 gemengde spanne van twee mans en twee dames. Die wedstryde is by die L’Agulhas en Bredasdorp Rolbalklubs gespeel.

Die Classic het Woensdagaand afgeskop met registrasie en die amptelike trekking, waar President Andre (Kulu) Cruywagen die spelers verwelkom het. Dit was heerlik om te sien hoe ou vriende weer saamkuier voordat die kompetisie begin het.

Nog ’n mylpaal vanjaar was die bekendstelling van die Match Planner elektroniese puntestelsel, wat saam met die tradisionele puntestelsel gebruik is.

FINALE UITSLAE

• 1ste: Santjie Olivier, Colleen Pikith, Gavie Du Toit en MP Olivier (Swellendam) -’n uitstekende 56 punte uit ’n moontlike 60!

• 2de: Kobus Lubbe, Schalk Mouton, Elmarie Lubbe en Ezile Fourie-Swart (Swellendam/Bredasdorp) - 41 punte, (uittel)

• 3de: Stephan Chambers, Renet Chambers, Elana Fourie en Herman Fourie (Hermanus) - 41 punte

• 4de: Doug Wyatt, Derick Kiely, Maria Orsmond en Kim Kiely (Durbanville) - 39 punte

PLAAT

• Wenners: Corrie Smit, John Woodcock, Diane Moller en Adrian van Zyl - (L’Agulhas)

• Naaswenners: Jacques Prins, Jantjies Giliomee, Estelle Madden en Johna Giliomee - (L’Agulhas)

Ons jarelange hoofborg, Schalk Lourens, was teenwoordig om die pryse te oorhandig en, in ware Classic-tradisie, het elke speler met ’n prys huis toe gegaan.

BAIE DANKIE!

’n Toernooi van hierdie omvang verg maande se voorbereiding en baie gewillige hande. ’n Groot dankie aan al ons borge, komiteelede, vrywilligers, baanpersoneel, kombuis- en kroegspanne, wedstrydbeamptes en almal wat agter die skerms gewerk het.

’n Spesiale woord van dank aan Bredasdorp Rolbalklub vir julle samewerking en bydrae om die drie dae so ’n groot sukses te maak.

Die belangrikste van alles - baie dankie aan die 80 rolbalspelers wat ons mylpaaltoernooi ondersteun het. Die Classic gaan oor soveel meer as net rolbal - dit gaan oor vriendskap, kameraadskap en om mense deur die sport waarvoor ons lief is, bymekaar te bring.

25 jaar van die L’Agulhas Classic - en steeds sterk aan die gang! Op die volgende 25 jaar! 

VLNR: Schalk Lourens (Hoofborg), Colleen Piketh, Santjie Olivier, Gavie Du Toit en MP Olivier (Swellendam) 1ste plek 

VLNR: Schalk Lourens (Hoofborg), Kobus Lubbe, Schalk Mouton, Elmarie Lubbe en Ezile Foure-Swart (Swellendam/Bredasdorp) 2nd plek

VLNR: Jacques Prins, Jantjies Giliomee, Estelle Madden en Johna Giliomee (L’Agulhas ) - Plaat naaswenners  en Schalk Lourens (Hoofborg)

VLNR: Schalk Lourens (Hoofborg), Stephan Chambers, Renet Chambers, Herman Fourie en Elana Fourie (Hermanus) - 3rde plek

VLNR: Schalk Lourens (Hoofborg), John Woodcock, Corrie Smit, Diane Moller and Adrian van Zyl (LAgulhas) - Plaatwenners