Napier se leeskringlede lê besoek af op Stanford

Met grendeltyd agter die rug en 2021 se leesjaar amper op sy kop, het Napier se Leeskringlede besluit om vir oulaas die vlerke te sprei. Op Vrydag, 15 Oktober het lede dan ook vir die eerste keer sedert Maart 2020, 'n “lewendige” leeskring uitstappie onderneem. Lede het ook van die geleentheid gebruik gemaak om afskeid te neem van Joan Wilken, leeskringlid en bekende sangeres van Napier wat eersdaags na George verhuis.

Daar is besluit op die buurdorp Stanford met sy twee boekwinkels en 'n interessante staproete met 'n koffiewinkel of twee tussenin. Die oorspronklike woning van Robert Stanford, eienaar van die plaas waarop die dorp later ontstaan het en na wie die dorp vernoem is, dateer uit 1785 en huisves boekwinkel nommer een. In boekwinkel nommer twee wat aan die anderkant van die dorp geleë is, het lede toe ook sommer kennis gemaak met Annelize Mouton, die skrywer van verskeie artikels en boeke oor die Overberg van ouds. Omring deur so baie boeke, waarvan baie ou gunstelinge is, kon lede sommer weer begeesterd en vol nuwe idees en gedagtes vir die nuwe leesjaar wat voorlê terugry Napier toe.

Wie sou kon dink dat die distrik Stanford in “die ou dae” deel uitgemaak het van die NG gemeente Napier.

Ora Laubscher