Die inisiatief is al sedert 1982 in plek, maar het sedert daardie heel eerste poging, letterlik en figuurlik van krag tot krag gegaan. Die Trans Enduro soos wat ons dit vandag ken en ervaar, het volgens oorlewering begin met 'n paar offisiere wat geen vakansiekrediet meer gehad het nie, maar tog wel 'n positiewe blaaskans of wegbreek van die daaglikse roetine wou gehad het.

"A change is as good as a holiday” lui die Engelse spreekwoord. Ware woorde, want verandering werk wondere, al moet 'n mens steeds hard werk en hard oefen. Die groep het gekom met 'n voorstel om 'n uithou en aanhou reis al langs die mees suidelike kuslyn van die destydse Port Elizabeth - tans bekend as Gqeberha - tot in Saldanhabaai te onderneem. Min het hulle op daardie stadium geweet dat hulle in 1982 'n trotse tradisie wat in 2022 'n volle 30 jaar op die kerfstok sal hê, begin het. Aangesien die studente self alles organiseer, onder die bekwame en wakende oog van hulle bevelvoerders en mentors, word die jaarlikse goedgeorganiseerde Trans Enduro toer beskou as 'n uitstekende oefenlopie in organisasie, skakeling en openbare betrekkinge. Langs hierdie weg word die toekomstige offisiere van die SuidAfrikaanse Weermag wat aan die Akademie studeer, deeglik voorberei vir hulle toekomstige aktiewe loopbane in die SAW. Afgesien van die fisiese uithou aktiwiteite ter see en op land, samel die studente ook geld in vir hulle MASIZA gemeenskapsuitreikprogramme waarby ons streek nou ook al by meer as een geleentheid gebaat het.

Ora Laubscher