Italiaanse swier by die Ou Tronk

Sowat 60 gaste het opgedos vir ’n langtafel-ete by die Ou Tronk Vrydag, 18 Februarie, wat deur die Vriende van die Skeepswrakmuseum, in samewerking met die museum, aangebied is.

Die tema was Italiaans en die gaste is vermaak deur ’n minnesanger van Gordonsbaai.

Die binnehof van die tronk, wat hom uitstekend leen tot onthaal op ’n somersaand, is verfraai en The Bayleaf van Napier, wat homself uithuur as ’n pop-up spysenier, het Italiaans gekook om die tema te komplementeer.

Letty-Ann Möller, voorsitter van die Vriende van die Skeepswrakmuseum, het aan Suidernuus die geleentheid gegee om by die Ou Tronk in te loer en te gesels terwyl sy en haar man Danie ’n oog gehou het oor die voorbereidings vir die aand se verrigtinge.

Die ete is ten bate van die Skeepswrakmuseum se dakfonds aangebied.

Benewens dié oorhoofse rede, is die langtafel-ete ook deels gehou om die Ou Tronk te benut en mense bewus te maak van sy ouwêreldse ambience. Andersyds was die doel natuurlik om gemeenskap saam te smee en lekker saam te kuier, het Möller vertel.

Die Vriende van die Museum hou op 19 April ’n damestee by die Skeepswrakmuseum waartydens Kobus Pretorius oor parfuum gaan gesels terwyl ’n trekklavierspeler musiek sal maak.

Die Vriende van die Skeepswrakmuseum bestaan uit agt lede wat almal hul dienste op ’n vrywillige basis verleen.

Plaaslike verslaggewer