Met ’n swartsak in die hand wil ’n groep skoliere van Hoërskool Bredasdorp ’n verskil in hul gemeenskap maak, “al is dit ’n klein een”. Só sê Amanda Gouws, ’n graad 11-skolier en die voorsitter van dié skool se ATKV Byekorfspan.

Amanda het die opruimprojek voorgestel nadat sy tyd by haar oupa se graf deurgebring het en die gebrek aan vullisdromme by die Bredasdorp begraafplaas opgemerk het. Op 17 Februarie het sy en haar spanmaats – Marke Adams, Cassidy Dyers, Riley Dowrie, Carla Mitchell en Palesa Namise – daad by die woord gevoeg.

“Ons het een middag ná skool met handskoene en ’n paar swartsakke afgery en net gaan vullis optel,” het Amanda aan Suidernuus vertel. Die Byekorfspan het aanvanklik ontstaan as ’n geleentheid vir skoliere om meer betrokke te wees by hul gemeenskap.

Om gemeenskapswerk met akademiese verpligtinge te balanseer kan egter uitdagend wees, volgens Amanda, omdat al die spanlede se skedules in ag geneem moet word. Daarom vergader die span weekliks en beoog hulle om die opruimprojek voort te sit deur kwartaalliks by die begraafplaas rommel op te tel.

“Ons wil met hierdie projek meer respek toon aan die mense wat eens deel was van ons gemeenskap,” verduidelik Amanda. Hiermee help hulle om die begraafplaas netjies te hou, aangesien nie alle families naby genoeg bly om die grafte te kom versorg nie.

Die opruimprojek is net een van vele inisiatiewe waarby die Byekorfspan betrokke is. “Ons het ook ’n skooltuinprojek waar ons vetplantjies plant, en ons reël verskeie funksies en ander kulturele projekte,” vertel Amanda.

Anri Matthee