Franskralers se seun Wêreldkampioen in Veldteikenskiet

Die 2023 Wêreldkampioen in Veldteikenskiet, Gerhard Genade, se trotse ouers is die bekende Gielie en Annaleen Genade van Franskraal. Annaleen is die organiseerder van die jaarlikse Borskankerstap in Franskraal. Nou val die kollig op hulle seun in die Proteaspan met sy trotse prestasie as Wêreldkampioen in Veldteikenskiet.

“Ek kan byna nie beskryf hoe ek oor my oorwinning voel nie,” het Gerhard gesê. “Om die wêreldkampioenskap te kon wen, is vir my die toppunt van my skietloopbaan.” Hy vertel dat hy as ʼn jong seun gereeld met sy kettie rondgeloop het. “Ek het teikens opgestel en dit terdeë geniet wanneer ek in die kol is,” het hy glimlaggend gesê. Hy het eers in 2009 op die ouderdom van 32 met sy veldteikenskietloopbaan op ‘n mededingende basis begin deelneem.

Die 31ste World Field Target Federation se wêreldkampioenskappe van 23-27 Augustus 2023 is vanjaar in die Kommandonek-oord naby Hartbeespoortdam, Noord-Wes Provinsie, gehou. Suid-Afrika het as gasheerland opgetree, met die South African Field Target Airgun Association (SAFTAA) as mede-organiseerders. Die Suid-Afrikaanse Proteaspan het 1ste uit 10 lande geëindig, met Gerhard Genade wat as Wêreldkampioen in Veldteikenskiet gekroon is.

Die deelnemende lande (alfabeties) was België, Engeland, Iran, Nederland, Noord-Ierland, Poland, Portugal, Suid-Afrika, VSA en Wallis. Die agt gesoute Suid-Afrikaanse skuts van die Proteaspan (alfabeties), was Danel van Tonder, Derek van Niekerk, Gerhard Genade, Gerhard Strydom, Heinri Brink, Jan Steytler, Machiel Basson en Wian Strydom.

Veldteikenskiet is ʼn buiteluggeweerdissipline wat in die vroeë 1980’s in die Verenigde Koninkryk (VK) ontstaan het en wêreldwyd al hoe meer gewild word. In Suid-Afrika is Veldteikenskiet vir die eerste keer in 2003 bekendgestel - dus was dit vanjaar hierdie sport se 20ste bestaansjaar in Suid-Afrika.

(Foto’s verskaf)

Hardus Botha