Hospitaal-Nuus: Overstrand Medical Centre

Gansbaai se hospitaal, die Overstrand Medical Centre (OMC), se eerste sooi is op Vrydag, 28 Julie 2023 deur Raadsdame Riana de Coning gespit. (Gans-Berg Nuus, 28 Julie 2023). “Die langverwagte droom om ons eie hospitaal vir die Gansbaai-gemeenskap te kry, het vandag gerealiseer en ek voel lus om ‘Halleluja’ te skree!” - het sy op daardie welkome en vreugdevolle dag gesê.

Intussen het die Gans-Berg Nuus verskeie navrae oor Staatspasiënte se toegang tot die hospitaal ontvang. 

Die antwoord wat in hierdie verband van dr Pierre Nel ontvang is, lui soos volg: “Die hospitaal is wel 100% privaat, maar ons gaan ‘n Service Level Agreement (SLA) met die Departement van Gesondheid aangaan om pasiënte wat nie Privaat Gesondheidsorg kan bekostig nie, by te staan en te akkommodeer. Sulke pasiënte sal dan in noodgevalle deur ons gestabiliseer word en dan na ‘n Staatshospitaal oorgeplaas word.”

Dr Nel het ook bevestig dat alles met die hospitaal volgens plan verloop en die gemeenskap kan rustig wees, al wil dit soms lyk asof aktiwiteite tot stilstand gekom het - dit is alles behalwe die geval, aangesien baie werk agter die skerms gedoen word. “Ons is tans besig om die ‘sewage line’ van 190 meter in te sit,” het dr Nel gesê. “Dit lê 2 meter diep en moet met die hand gedoen word, aangesien dit fibre, waterpype, elektriese kabels, rioolpype en die dies meer kruis.” Hou die Gans-Berg Nuus dop vir enige verdere verwikkelinge. 

Hardus Botha