Tophengelaar in die Land - Pieter du Toit (Jnr)

Om as die Tophengelaar, waarskynlik in die land, beskou te word, is sonder twyfel noemenswaardig - des te meer as daardie hengelaar ‘n Gansbaaier is! Pieter du Toit (Jnr) het met sy uitmuntende prestasies as o/21 hengelaar tydens die Internasionale Hengelkompetisie in Desember 2023, asook in die Nasional Hengelkompetisie van Januarie 2024 bewys waarom dit die geval is.

Tydens die Internasionale Hengelkompetisie van 2-8 Desember 2023 in Namibië het Pieter die o/21 Proteaspan verteenwoordig. Daar is hy eerstens as die Hengelkampioen in die o/21 Afdeling aangewys en tweedens as Algehele Wenner van die Toernooi, wat alle afdelings insluit, soos Seniors, Meesters, Dames, ens.

Pieter se totale gewig van visse wat hom hierdie prestasies laat behaal het, was ‘n allemintige 481.5kg. Hy het 4 bronshaaie van meer as 100kg elk gevang, waarvan 3 op dieselfde dag gevang is, wat die grootste bronshaai ingesluit het. Wat sy prestasies des te meer groter maak, is dat dit die 2de agtereenvolgende jaar is wat hy as Algehele Kampioen bekroon word - dit is ‘n eerste in die geskiedenis wat dit gebeur het. 

In Januarie 2024 ‘woed’ Pieter voort op sy oorwinningspad. Hy neem deel aan die Nasional Hengelkompetisie te Struisbaai in die o/21 Juniors afdeling, waar hy weer sy Protea-klere verwerf. Nou is Pieter gekeur om vir die 3de agtereenvolgende jaar in Desember 2024 na Namibië te gaan. Aangesien hy onlangs 21 jaar oud geword het, was dit sy laaste kompetie as o/21 hengelaar. Voortaan gaan hy in die Senior Afdeling sy staal moet wys.

Pieter (Jnr) se pad na sukses

Kyk mens terug op Pieter (Jnr) se suksesvolle hengel-pad, spog hy met baie rekords sedert hy by die WP o/16’s in 2016 aktief betrokke geraak het en ook sy Boland-kleure verwerf het. Daarna volg die o/21’s, waar hy in die 2018/19 hengelseisoen as Algehele Junior Kampioen van die WP gekroon word en in die o/21 Proteaspan opgeneem word. Hy is hy ook die WP-rekordhouer (o/21) vir sy skeurtandhaai van 225kg, asook vir sy bronshaai van 193kg. Hy hengel vir die Westelike Provinsie (WP), maar is by Tygerberg Rots- en Strandhengelklub geaffilieer. Pieter het op die vistreiler, Wafra van Boetie (Oubol) Wessels gewerk, maar is tans op die vistreiler, Stormgans van Stollie en DP Fourie. 

Pa en Seun Hengel-kombinasie

Pieter (Snr) en Pieter (Jnr) is soos Vinkel en Koljander waar dit by hengel kom. Pieter (Snr) spog self met uitstekende hengel-prestasies in die verlede, maar tans geniet hy sy amp as afrigter van die o/16 Protea-hengelaars, waar hy die geleentheid het om sy kennis en ervaring aan die jonger geslag oor te dra.

Pieter (Jnr) bedank graag sy Spanbestuurder, Morné Esterhuysen en sy afrigter, Xander de Beer vir die afgelope 2 jaar se vertroue in hom, hulle ondersteuning en bystand. “Dankie ook aan alle Gansbaai ondersteuners, borge en donateurs (hulle weet wie hulle is!),” het hy gesê. “Elkeen het ‘n bydrae gelewer in die verwesentliking van my droom!”

Hardus Botha