Die ‘Boet van Visnette’
Besoekers en vakansiegangers sal in die loop van die volgende paar dae ‘n hele bedrywighede met ons Pelagiesie Vissersbote...
Brande
Hoe sê mens Dankie....
om dit ten diepste oor te dra?
‘Bravo aan ons Brandbestryders’
Die afgelope tyd se verwoede veldbrande het menige inwoner met bevange moedeloosheid ten gronde gedruk. Oral het gebede opgegaan vir die erns van die brande en die vinnige verspreiding daarvan, maar veral vir ons onverskrokke brandbestrydingsmanne en -vroue wat onverpoos, dag en nag, gewerk het om verligting te bring.
Volledige inligting oor die brande is deurgaans van hoek tot kant versprei, ook telkens wanneer nuwe brande begin het. Hierdie berig het ten doel om ten diepste dankie te sê - mens weet net nie waar om te begin nie: Overstrand en Overberg Brandweerdienste; Working on Fire; ander organisasies; Boere-gemeenskappe; vrywilligers wat sonder om te huiwer gehelp het waar hulle kon; verskeie organisasies, besighede en individue wat welkome eet- en drinkgoed vir ons uitgeputte brandbestryders geskenk en aangery het; so veel om op te noem en so veel om voor dankbaar te wees!
Dit is hartverskeurend om te dink aan soveel mense wie se lewens deurmekaar gegooi is, mens en dier wat daaronder gelei het, maar daarmee saam die kalmte en vrede wat gebede vanuit alle oorde gebring het. Kan daar ‘n meer beangste en spanningsvolle opdrag wees as: “Julle sal julle wonings moet ontruim?” Wat gaan saam, wat bly agter - en dan is daar nie tyd vir dink en wonder nie - emosie op emosie moes deur elkeen gegaan het!
Overstrandse Uitvoerende Burgemeester, Raadsdame dr Annalie Rabie, kan uit volle bors bedank word vir haar byna ‘alomteenwoordigheid’ by die onderskeie veldbrande en haar stiptelikheid om inwoners in die Overstrand deurgaans ingelig te hou. Die Gans-Berg Nuus het haar verskeie kere raakgeloop en dit was duidelik dat sy alle aspekte van die brande ter harte opgeneem het. Dankie ook aan Raadslid Riana de Coning vir haar gereelde insette.
‘n Gemeenskap sê dankie aan ons Hemelse Vader vir sy hand van beskerming, die beskerming van ons brandbestryders en vir hulle, asook alle andere, se opofferinge gedurende hierdie tyd en steeds, aangesien alles nog nie verby is nie - Bravo aan elkeen wat ‘n rol gedurende hierdie moeilike tyd gespeel het!
