AVBOB Se ‘Sirkusnarre’ Laat Skaterlag

-Bietoubos Damesklub-

“Met dié dat AVBOB Begrafnisdienste ons op 9 April 2024 besoek het, sou mens dink dat die atmosfeer maar stroef sou wees - toe is dit allesbehalwe die geval,” vertel Elizma de Lange van die Bietoubos Damesklub. “Om die besoek die moeite werd vir AVBOB te maak, het ons ook vriende van buite, met hulle wederhelftes, genooi om die byeenkoms by te woon.”

Elizma sê Yolanda Pretorius van AVBOB se bemarkingsafdeling het die sowat 58 gaste oor ‘n paar belangrike aspekte ingelig:

• Die voordele van 'n begrafnispolis;

• Die belangrikheid om dokumente wat na die afsterwe van ‘n persoon benodig word, op datum te hou sodat die boedel makliker afgehandel kan word. ‘n Dokument, “My Lewenslêer”, is deur AVBOB opgestel, wat gratis aan die gaste uitgedeel is. Daarin word insiggewende leiding gegee van wat alles benodig word.

• Jolanda het die hebriede (water) verassing volledig verduidelik. “Dit is ‘n vorm van verassing wat al hoe gewilder geword het aangesien dit meer ‘natuurvriendelik’ as gewone verassings is.”

“Na al hierdie waardevolle inligting wat aan ons oorgedra is, het ons by die hoogtepunt van ons byeenkoms uitgekom,” het Elizma gesê. Sy sê Therené en Melanie van Crown Create Studio, wat deur AVBOB geborg is, het die gaste met ‘n uitstekende sang- en geselsprogram vermaak. “Fly me to the moon”, “On top of the world” en “Dis ‘n Land”, is maar ‘n paar van die sangnommers wat groot byval gevind het.

Therené en Melanie het die gaste op hulle tone gehou - twee regte ‘sirkusnarre’ wat terdeë geniet is, is gesê. Hulle het die gaste met op-en-wakker sangitems vermaak, hulle laat saamsing en mannewales uitgehaal wat almal laat skaterlag het, met ‘n oorvloed van humoristiese optredes. “Dié twee se optrede by ons was gesellig, genotvol en gevul met goeie humorsin,” het Elizma gesê. 

Die twee gaskunstenaars het hulle aanbieding met die inspirerende “I’m still standing”, afgesluit. “Daar bestaan geen twyfel dat ons lede en gaste met ‘n ‘lied in die hart’ huiswaarts gekeer het nie,” vertel Elizma.

Hardus Botha