Overberg Kushengelklub - Melchi Botha is Hengelaar-van-die-dag

“Saterdag, 12 Oktober 2024 was dit die klub se voorlaaste kompetisie vir die jaar en ook die laaste voordat die galjoenseisoen toemaak,” vertel Elba Tredoux van die Overstrand Kushengelklub. “Die seisoen is byna halfpad en die voorste spanne en hengelaars begin jaag vir punte!” Sy sê die speelveld (of see) is egter nog wawyd oop.

“Die plat, skoon waters van die naweek het nie baie belowend gelyk nie, maar nogtans is daar n groot aantal visse ingeweeg,” het Elba bygevoeg. Melchi Botha se Steenbras van so rapsie meer as 7kg, het hom die wenner van die dag gemaak. Sihan Toua was tweede, met Mias Albrecht in die derde plek.

Elba sê die wenners van die dag het almal die funksie bygewoon, met ‘n gesellige onderlinge gees, smaaklike kos en op-en-wakker musiek wat onverbeterlik was.

Hardus Botha