The Masked Spa Se Verjaarsdag
In 2023, aan die begin van Desembermaand, het verbygangers se koppe behoorlik in die rigting van Hoofstraat 30 gedraai.
VLV sluit 2024 met ‘Skaterlag’ af
Die Vroue Landbou Vereniging (VLV), Gansbaai-tak, het op 5 November 2024 hul jaarlikse aktiwiteite met ’n suksesvolle “vinger-ontbyt” en skreeusnaakse “Skaterlag-Konsert” afgesluit. Die geleentheid, bygewoon deur meer as 70 gaste, insluitend die eregaste Elbie Fourie, Sirkelpresident van die Overberg Sirkel, en Rinie Ludick, voormalige VLV-voorsitter, is beskryf as ’n groot sukses. Senerita van der Walt, VLV-voorsitter, het groot waardering uitgespreek teenoor die NGK se Gansvryheidsbediening se dames, onder leiding van Elcine Hulme, vir die uitstekende ontbyt en prag-versierde tafels. Die konsert, wat gebaseer was op kinderverhale soos Rooikappie, Sneeuwitjie en Liewe Heksie en meesterlik deur Carien Badenhorst verwerk is, het groot lagtrane ontlok. Dit was ’n geskiedkundige gebeurtenis aangesien die VLV nog nooit met ’n konsert afgesluit het nie. Die dag is verder gekenmerk deur gesellige kuier, die oorhandiging van trofeë aan kompetisiewenners en interne toekennings. Volgens Senerita het die VLV hierdie jaar groot gemeenskapsfokus getoon deur projekte soos die oorhandiging van leesboekies aan kleuterskole, donasies aan die Tuinbouklub en BARC, en die skenking van mussies aan die bemanning van sewe pelagiese vissersbote. Met 67 lede het die tak ’n aktiewe en suksesvolle jaar beleef, nadat hulle verlede jaar hul 70ste bestaansjaar gevier het. Senerita het met trots genoem dat Gansbaai VLV tans die tweede grootste tak in die Kaap is, met die doelwit om die grootste te word.
Hardus Botha
