Janconet Vermeulen se 1ste oorsese Toutrektoernooi

‘n Oorsese Toutrektoernooi het uiteindelik vir Janconet Vermeulen van Gansbaai aangebreek - sy en Dewald van Heerden, Oogkundige by BiermanMalan Oogkundiges, was deel van die Suid-Afrikaanse Toutrekspanne wat op 2 September 2024 aan die ‘World Championships 2024’ deelgeneem het - die ‘Tug-of-War’ in Mannheim, Duitsland. Die spanne het ongelukkig nie goed gevaar nie, maar die ondervinding wat opgedoen is, was waardevol. Elke deelnemer het wel ‘n medalje vir bywoning ontvang.

“Dit gaan nie vir my oor wen of verloor nie,” het Janconet aan die Gans-Berg Nuus gesê. “Die ondervinding wat ek opgedoen het, beteken ongelooflik baie vir my én dit was my eerste vlug oorsee!” Sy het bygevoeg dat haar besoek aan Duitsland fantasties was, maar dat alles verskriklik duur is - “Ek was erg moeg vir kitskos en kon nie wag om weer by my ma se vleis, rys en aartappels uit te kom nie!”

Die span waarin Janconet was, was die Dames Ope span (540kg), asook die Dames Geslote span (500kg), waar hulle 10de uit 14 spanne geëindig het. Haar afrigter is Melanie Botha. Dewald, wat reeds sowat 4 jaar ‘n Suid-Afrikaanse Toutrekskeidsregter is, was by die Senior Gemengde span (580kg) ingesluit, asook die Senior Mans Geslote span (680kg). In eersgenoemde geval het hulle 10de uit 18 spanne geëindig en in die volgende 9de uit 12 spanne.

Ter inligting, die volgende: daar is 8 lede in ‘n span en die gesamentlike gewig van die spanlede is die gewig waarna daar in die kategorieë verwys word. Alle medaljes, WP-kleure en Protea-kleure wat verwerf word, word in spanverband gewen en nie as individuele lede nie. Die hoofkategorieë is die Ope (Opens) kompetisies waaraan enige toutrekklub kan deelneem, terwyl die Geslote (Closed) kompetisies is waar lande Nasionaal teen mekaar deelneem. 

Intussen is hierdie jonge dame steeds baie lief vir haar eie Hardley Davidson Street 750, waarmee sy vanjaar weer aan die Motorfiets Toy Run deelgeneem het. “Baie dankie vir wonderlike ondersteuning en donasies deur die gemeenskap, aangesien deelnemers uit eie sak so ‘n toer moet aanpak,” het Janconet gesê. “Ek het groot waardering daarvoor!”

Hardus Botha

Zoom

Zoom