“Dit is die eerste keer sedert Gansbaai OK Foods se opening wat ‘n personeellid werk tot en met sy/haar aftrede,” het Chris van Rensburg, eienaar van OK Foods, vir Elsabé Wolfaardt (60) tydens ‘n afskeidsgeleentheid gesê. Elsabé, ‘n bekende personeellid tussen die vrugte- en groenterakke, het ná sowat 22 jaar afgetree - “nou gaan ek net rus en rus en daarna besluit of daar iets is wat ek wil aanpak om myself mee besig te hou,” het Elsabé die Gans-Berg Nuus meegedeel. “Ek dra graag my opregte dank en waardering oor aan mnr Van Rensburg vir soveel wonderlike en gelukkige jare wat ek vir hom kon werk.”

Elsabé werk sedert OK Foods se opening daar - aanvanklik as kassier, maar die grootste deel van haar 22 jaar is sy die bekende en vriendelike gesig tussen die groente- en vrugterakke. OK Foods se kliënte, asook besoekers, sal haar sonder twyfel baie mis - veral vir haar spontane laggie, glimlagte en hulpvaardigheid, met gereelde komplimente teenoor haar. Haar oop gemoed vir humor was altyd opvallend. Dit is nou onder andere wanneer skrywer hiervan haar op ‘n gereelde basis ‘uitgetrap’ het omdat die piesangs nie mooi ‘in gelid’ lê nie. Wanneer hy water uit die watertenk tap, staan sy byvoorbaat nader met die mop, “want ek wéét sommer oom gaan water op die vloer mors!”

Elsabé is op 23 Januarie 1965 gebore en het onderskeidelik in die Vrystaat en Gauteng grootgeword. Op 18-jarige ouderdom het haar ouers in 1983 na De Kelders, Gansbaai, verhuis. Onder die ouer garde het hulle geen bekendstelling nodig nie - almal het van Oom Pine en Tannie Beryll Pienaar geweet, twee geliefde en gemeenskapsbetrokke inwoners vir baie jare, wat onderskeidelik 10- en 8 jaar gelede oorlede is.