Stranded Humpback Whale at Robberg Nature Res...
A young female Humpback stranded on the Island Beach at Robberg Nature Reserve.
Grusame motorongeluk eis 3 kinderlewens
'n Grusame motorongeluk op die R43 naby Stanford op 1 Mei 2025 om 11:48, het die lewens van drie kinders geëis - 'n 7-jarige seun, 'n 8-jarige dogter en nog 'n 10-jarige dogter wat opslag dood is. “Dit was 'n grusame toneel om te aanskou,” het AdjOff Booysen van Stanford SAPD gesê. Die ongeluk, asook foto's, is reeds wyd en syd op sosiale media versprei, maar Gans-Berg Nuus het met AdjOff Booysen gesels om seker te maak die feite is korrek.
‚n 'Taxi', met twee volwassenes (bestuurder plus nog 'n volwassene), was met 13 skoolkinders vanaf Gansbaai na Hermanus oppad. Na verneem word sou die kinders 'n NGO-projek bywoon. Dit het gereën en die pad was baie nat en glad. Na bewering het die 'taxi'-bestuurder beheer oor sy voertuig verloor, gegly en teen 'n aankomende Fortuner gebots. Die 'taxi' het gerol en teen nog 'n Fortuner gebots, voordat dit in 'n sloot langs die pad beland het, met van die kinders wat in die proses uitgeval het.
“Van die ander kinders is ernstig beseer, met een vrou wat uit die wrak gesny moes word, maar mediese personeel, ambulanse en die SAPD was vinnig op die toneel,” het AdjOff Booysen gesê. Die R43 was daarna vir etlike ure gesluit en die verkeer moes aanvanklik van die R326 (Papiesvlei-grondpad) gebruik maak. As gevolg van die reën, wat die grondpad baie gevaarlik vir die hoeveelheid voertuie gemaak het, is motorbestuurders ernstig versoek om van die alternatiewe roete via Napier / Bredasdorp gebruik te maak.
Bronagh Hammond, woordvoerder van die Wes-Kaapse Onderwys Departement (WKOD), het gesê hulle sal berading aan die skool beskikbaar stel sodra die leerlinge terugkeer van die vakansie af. Die Departement het ook sy medelye met alle betrokkenes en families betuig.
AdjOff Booysen het gesê 'n Saak van Strafbare Manslag word ondersoek.
(Foto's is verskaf)
Hardus Botha
prev
next
