Nuweling vir Gans-Berg Nuus ‘in aantog’
Ja-nee, dit was hoogtyd dat die Gans-Berg Nuus aan ‘personeel-uitbreiding’ begin dink het.
Laerskool Gansbaai: Johan Smit Lokaal Amptelik Geopen
Dit was ‘n vreugdevolle oomblik toe JP Coetzer die seremoniële lint vir die amptelike opening van die Johan Smit Lokaal geknip het. Die opening van die lokaal het saamgeval met Laerskool Gansbaai (LSG) se eerste en geskiedkundige Kultuuraand op Vrydag, 21 Oktober 2022 (sien berig in hierdie uitgawe). ‘n Verskeidenheid van kuns- en tegnologie-werke is vir besigtiging in die lokaal uitgestal. Die fokuspunt was die uitstalling van die Eisteddfod se Cum laude leerders.
In sy openingsrede het Jonathan Doyle (skoolhoof) vertel dat die lokaal in die 90’s gebou is. Thys Harmse was die destydse skoolhoof en Johan Pieterse van Jo-Signs die voorsitter van die Skoolkomitee. Die lokaal is na die skoolhoof wat in die laat 80’s afgetree het, Johan Smit, vernoem. Aanvanklik is dit as ‘n verkoopslokaal tydens sportbyeenkomste gebruik en daarna as ‘n stoorplek. Nog later is dit deur LSG se Interfase kuns- en tegnologie-leerders as ‘n klaskamer gebruik.
In 2021 het die Beheerliggaam besluit om ‘n fondsinsameling te hou om die lokaal op te gradeer. Onder leiding van JP Coetzer is ‘n suksesvolle ‘Trollie-Run’ in samewerking met Gansbaai OK Foods van Chris van Rensburg aangebied. Die fondse is benut om die vensters en deur te vervang, ‘n plafon in te sit en die banke af te skuur. Alle kuns- en tegnologieprakties en NW word nou daar aangebied. Met die volgende fase word beplan om die vloer te teël en om meer kragpunte in te sit.
Suid-Afrika se Liedjieboer, Anton Goosen en sy pragtige eggenote, Estie (self ‘n onderwyser), het ook die Kunsuitstalling en Kultuuraand bygewoon. Anton was vol lof oor wat deur die leerders op kuns- en kultuurgebied vermag word.
Na die amptelike opening is die gaste na die Klubhuis, waar ‘n glasie (sap) op die lokaal geklink is en lekker saamgekuier is. Vanaf die klubhuis het hulle na die skoolsaal beweeg vir die hoogtepunt van die aand - die aanbieding van ‘n luisterryke konsert, ‘Lighuis Drome’.
Hardus Botha
