Die blote gedagte aan geliefdes wat tot sterwe kan kom, is soms sò met emosie gevul, dat die belangrike onderwerp van boedels en verwante dokumentasie vermy word.

Die Bietoubossers het tydens hul Mei-maand byeenkoms in die NGK se Kleinsaaltjie van die belangrikheid van boedeldokumentasie verneem. “Ons was ietwat verslae by die aanhoor van hoeveel dokumente vooraf gereed gehou moet word en dat alles nie net oor ‘n geldige testament gaan nie,” het Elizma de Lange van die Bietoubos Damesklub van De Kelders, Perlemoenbaai en Gansbaai gesê.

Steve Serbon van De Kelders het as gasspreker opgetree. “’n Geldige testament, die oorspronklike sterftesertifikaat en die oorspronklike identiteitsdokument van die oorledene is vanselfsprekend van groot belang,” het Steve gesê. “Daar is egter nog bykans 30 dokumente en gesertifiseerde afskrifte van dokumente wat in gedagte gehou moet word.”

Enkele voorbeelde is gesertifiseerde afskrifte van huweliksvoorwaardekontrakte, titelaktes van eiendomme, munisipale rekeninge, huurkoopkontrakte, bankstate, telefoonrekeninge en selfs van TV-lisensies om maar net ‘n paar te noem. Steve het ‘n volledige lys van boedeldokumentasie aan die dames beskikbaar gestel wat hulle onder mekaar versprei het.

Na die insiggewende aanbieding deur Steve oor “minder aangename”, maar noodsaaklike inligting, is daar saamgekuier soos net die Bietoubossers dit kan doen.

Sosiale media

Elizma het in die klub se nuusbrief na vele positiewe, maar ook negatiewe op-en-aanmerkings op Facebook, Twitter en ander sosiale netwerke verwys, waar daar soms oorhaastig opmerkings kwytgeraak word wat baie skade kan berokken.

Haar gepaste aanhaling van ‘n African Proverb, laat ‘n mens diep dink. Dit lui soos volg: “The owl is the wisest of all birds, because the more it sees the less it talks!”

Zoom

Zoom