R43 Padgebruikers Kla: Padmakers Moet Spoed V...
Gansbaai Courant het heelwat klagtes van padgebruikers ontvang dat die R43-pad tussen Stanford en Gansbaai onveilig is.
Sosiale Media in vele vorme het gekom om te bly - voordele en nadele en al.
“Die enorme rol wat sosiale media in almal van ons se daaglikse lewens speel, kan nie onderskat word nie, veral nie by ons in die Toerismekantoor nie,” sê Glenda Kitley, Bestuurder: Gansbaai Toerisme. “Dieselfde geld vir die waarde van goeie foto’s wat ‘n storie vertel.”
Dit het Glenda laat besluit om ‘n werkswinkel vir selfoonfotografie vir die kantoor te reël.
Leanne Dryburgh, eienaar van Photowalkers in Hermanus, het ingewillig om ‘n werkswinkel oor die tegniek van selfoonfotografie in Gansbaai te kom aanbied.
Die insiggewende en leersame werkswinkel is Dinsdagmiddag, 6 Junie 2017 in die Toerismekantoor deur Leanne aangebied.
Sy het die werkswinkel met goeie wenke, advies en verskeie tegnieke wat vir selfoonfotografie nodig is, begin.
Daarna het die groep stadig in die rigting van Gansbaai hawe gestap - met die opdrag om op die uitkyk vir goeie fotomoontlikhede te wees, terwyl Leanne advies en leiding verskaf het en praktiese wenke voorgestel het.
Die groep moes veral fokus op kleurkombinasies, lighelderheid en om die ideale hoek vir die neem van foto’s te bepaal.
“Ons moes selfs op die grond gaan lê om die regte hoek vir ‘n foto te kon kry,” vertel Glenda. “Alles was egter die moeite werd en baie insiggewend en ons het nie net baie geleer nie, maar veral die praktiese gedeelte van die werkswinkel baie geniet.”
Gansbaai Toerisme se span was Glenda Kitley (Bestuurder), Doulene Els, Maureen Valentine en Akhona Jordaan. Glenda het ook vir Maraika van Wessen, die Toerisme Buro se bemarker en Jean-Marie van Eck, Gansbaai Academia (sosiale media) na die werkswinkel genooi.
Glenda sê die belangrikste opdrag deur Leanne aan hulle is om nou soveel as moontlik in die praktyk te gaan toepas wat hulle geleer het.
