Ons is dankbaar vir al die besoekers wat Gansbaai as vakansieplek gekies het, dit is `n voorreg om u (weer eens) hier in ons pragtige omgewing te kan ontvang.

Ek vertrou dat elkeen, asook ons plaaslike inwoners, 'n Geseënde Kersfees geniet het en steeds met oorgawe vakansie hou en lekker sal uitrus. Ek glo ook u voel tuis by ons en geniet alles wat ons pragtige omgewing u elke dag bied. Dit wissel van die natuurskoon, tot vele aktiwiteite, staproetes, grotte en die “agterpaaie” in die omtrek.

Daar is lekker eet- en kuierplekke in ons omgewing, selfs langs die grondpaaie, Baardskeerdersbos en verder. Ook die weer gee vanjaar iets van alles. Daar is ook baie musiek-vermaak vir die hele gesin, geniet dit. Besoek asseblief ons Toerismeburo (langs die Spar-sentrum), waar die vriendelike personeel wag met baie inligting en uitstallings oor wat om te doen en sien. Daar is ook interessante kaarte oor buitelug-roetes wat gevolg kan word. Skakel hulle gerus by 028-384-1439 of stuur 'n e-pos aan gansbaaiinfo@telkomsa.net.

Ons webtuiste, www.gansbaaiinfo.com/ www.gansbaai.com kan ook besoek word. Ons gerieflike kantoorure is Saterdag,  29ste: 09:00-16:00; Sondag, 30ste: 10:00-14:00; Maandag, 31ste: 08:00-16:00; Dinsdag, 1ste: 09:00-14:00. Daarna sal dit weer die normale ure wees: Maandag tot Vrydag 08:30-17:30, Saterdae 09:00-16:00 en Sondae 10:00-14:00. Ons plaaslike inwoners, besighede en diensverskaffers is gerat om u te laat tuis voel en in al u behoeftes te voorsien. Dwaal dus maar ook in die besighede rond en ontdek alles wat Gansbaai u kan bied.

Ons wens u elkeen 'n baie Voorspoedige 2013 toe, mag dit met elkeen van u baie goed gaan met alles wat u aanpak of beleef.  Dit is ook ons bede dat u reis huis toe ná die vakansie veilig sal wees, en dat ons u 'n volgende keer weer sal sien.

Johan Pieterse, (Voorsitter) en Komitee, Gansbaai Toerisme Buro