Maria en Josef het hulle babatjie Jesus genoem, net soos die engel ‘n paar maande tevore vir Josef gesê het.

Veertig dae later neem Maria en Josef die klein Jesus na die tempel in Jerusalem, n paar kilometer van Betlehem. Maria dra die seuntjie versigtig in haar arms terwyl hulle deur die besige strate stap en Josef loop voor. God het beveel dat die Joodse mense al die eersgebore seuntjies aan Hom moet wy. Marie en Josef het God gehoorsaam en die wydingseremonie gaan uitvoer.

‘n Regverdige man met die naam Simeon het in Jerusalem gewoon. Die Heilige Gees het vir hom gesê dat hy die Messias, die Verlosserkoning wat God lank tevore beloof het, sou sien voordat hy sterf. Daardie dag sê die Gees vir Simeon om na die tempelhof toe te gaan. Daar sien hy ‘n jong paartjie met ‘n babatjie. Met ‘n hart wat spring van vreugde loopSimeon na hulle toe. Hy het Maria seker verras, want hy neem die babatjie in sy arms. “Here, U het U belofte aan my nagekom, en nou kan ek in vrede sterf. Hierdie kindjie is U verlossing vir die mense van Israel en vir die res van die wêreld.”

Maria en Josef was verbaas oor Simeon se woorde. Toe Simeon die klein Jesus aan Maria teruggee, sê hy vir haar: “ Hierdie kind het ’n spesiale roeping. Baie mense sal deur Hom verander word, maar sy lewe sal vir jou moeilik wees.”

Toe seën Simeon vir Maria en Josef. Net toe Simeon klaar is, kom n profetes met die naam Anna na hulle toe en dank God vir die babaseuntjie.
Baie mense het uigesien na die verlossing van Jerusalem en Anna het hulle alles van die spesiale babaseuntjie vertel.  (Bron: Bybel vir Kleingoed)