In 'n oogwink is nog 'n jaar verby - nog 'n jaar waarop ons met dankbaarheid kan terugkyk en ons Hemelse Vader eer vir al sy liefde en genade aan ons as mense bewys.

Vir ons gesinne en kinders het die jaar afgeskop met die aanvang van gesinsdienste in die saal en hierdie eredienste word met groot entoesiasme ervaar. Kategeseklasse is deur 'n toegewyde span kategete aangebied en is ons bly om te kan meedeel dat dieselfde groep aangaan met hul klasse vir volgende jaar.

'n Ander hoogtepunt was die aanbieding van die eerste Jeug-basaar op 4 Oktober. Gepaste woorde om die betrokkenheid en geesdrif van sowel ouers as die kinders te beskryf, ontbreek, maar almal is dit eens dat daar klaar uitgesien word na die basaar van 2014.

Deur die jaar was daar verskeie aktiwiteite - Vrugte-fees te Strandskloof en kampe by Uilenes en Uylen-vlei - was almal wonderlike, opbouende geleenthede vir ons as kategete, ons kinders en hul ouers.

Vir die nuwe jaar word beplan om 'n nuwe baadjie vir die vrugtefees aan te trek deur dit te kombineer met 'n gesinskamp die naweek van 24 tot 26 Januarie 2014 en  ouers sal betyds verdere inligting hieroor ontvang.

Ons Kommissie Gesins-en Jeugbediening wens elkeen die beste wense vir 'n gelukkige vakansie en Kerstyd toe .