Sowat 20 dames van die NG vrouediens van Pearly Beach het Herberg-aan-See besoek en gesorg vir ’n dag vol verrassings. Volgens Alta van Niekerk is dit is ‘n projek op hul jaarprogram en is dit altyd wonderlik om HaS se in-woners te besoek en te bederf. Die kuier het begin met gesellige samesang, met Alta agter die klavier. Daar is met die sing van geestelike liedere begin en later na vrolike en opgewekte liedere oorgeskakel. Instrumente is onder hulleversprei, waarmee die bejaardes lustig kon saamtokkel.

Engela Basson het ‘n boodskap aan die bejaardes gebring en daarop gewys dat hulle nog ‘n waardevolle lewensrol het om te vertolk. Die besoek aan HaS gaan altyd gepaard met verversing en eetgoed en die Pearly Beachers het seker gemaak dat daar geen tekort was nie. Die bestuur en personeel is bedank vir die wonderlike en vriendelike ontvangs en word ook bedank vir die puik versorging van die inwoners van die tehuis.