Ruik, voel en proe 

Ek was nog altyd aangegryp deur die aardse van die sakramente. Brood, wyn en water. Asof die Here weet ons moet soms ook sien, ruik en voel en nie net hoor nie. Hy kom mos na ons in materie. Eerstens sy eie vlees en dan al hierdie aardse elemente. Tog is ‘n simbool net verstaanbaar vir die wat die verhaal ken. Daarom is die erediens die plek vir die sakrament waar ons deur die Woord herinner word wie ons is en waar ons vandaan kom. Waar God se reddende handelinge deur die eeue weer aan ons verkondig word. Daar waar ons hoor dat Hy altyd eerste kies. Dit is juis as ons dit weer hoor dat die ruik, proe en voel dit wil bevestig. Die nagmaal formulier sê dan ook: “So seker as wat die brood voor ons oë vir ons elkeen gebreek word, en so seker as wat die wyn voor ons oë vir ons elkeen geskink word, ja, so seker as wat ons dit met die mond eet en drink, so seker het ons deel aan Christus, aan sy sterwe en opstanding.”