God kom altyd na my toe

Die sakramente se simboliek wil ons herinner hoe God is. Hoe God werk. Die Jakobverhaal in Genesis 28 het my nog altyd gehelp om die doop te verstaan. Jakob, die kleinseun van Abraham aan wie God verbondstrou belowe het, hardloop weg van Berseba na Haran. Weg van sy broer wat hy verkul het. Elke aand plaas hy sy kop op ‘n klip en een aand (tussen baie op ‘n 800 km reis) droom hy van ‘n trap wat die hemel en aarde verbind. God praat met hom. Beloftetaal en verbondstaal.  

Ten spyte van sy onlangse slegte geskiedenis reën die beloftes op hom neer. Hoekom? Omdat God getrou is aan sy beloftes aan Abraham se nageslag. Die beloftes tel meer as die karakter van die een aan wie die beloftes gemaak word. Ons bring ons kinders omdat God kies voordat ons ons kan bewys. Hy kom haal ons as ons nog ver is. Hy bevestig en gee hoop. Ons is die ontvangers van die water, die brood, die wyn en bowenal die lewe.