Die basaar van Gansbaai op Saterdag 27 April was weer ‘n toonbeeld van lidmate wat saamwerk en ‘n basaar aanbied waar basaargangers na hartelus kon saamkuier en koop. Daar was beskuit en brood, flessies met ingelegde eetware, groot koeke, handwerk, koeldrank, klein koekies, koeksisters, lekkergoed, melkterte, pannekoek, pasteie, poeding, potjiekos, sosaties, vetkoek, vis, viskoekies en kerrievis, Die NG gemeente van Greyton het die vleistafel beman. Die tombola en wit olifant-tafel het groot aftrek gekry. In die Koffiehuis het Eddie Barnard lekker musiek gemaak. 
Ons Hemelse Vader het ook weer hierdie basaar geseën en ons dank en eer Hom.

Afgesien van die weer en minder besoekers oor die naweek, was die basaar ‘n heerlike gemeenteaktiwiteit. Die kerkraad bedank almal betrokke en almal wat so hard gewerk het, asook almal wat bydraes gemaak het, en die basaar ondersteun het.

Humor uit ’n basaar-rekeningboek van toentertyd:
Mnr X, Stofstraat, Gansbaai.
Jy skuld nog altyd! Het daardie prent wat jy op die basaarveiling gekoop het, nog nie op jou kop afgeval omdat jy nie jou skuld - en dit nogal aan die kerk - wil betaal nie? R5.20 + rente. Baie dankie, Tesouriere