“Ons spog met ‘n eerste VGK-basaar in Pearly Beach,” vertel Johan van Dyk van Pearly Beach. Die basaar is nie op die tradisionele wyse aangebied nie, maar as ‘n basaar-ete waarvoor die kaartjies vooraf verkoop is, “en dít is beslis ‘n eerste vir Pearly Beach!” Julie Roussouw en Maria Hoffman was die inisieerders van die “nuwe idee” en die basaar-ete is op 25 Oktober in die VGK-saal in Eluxolweni aangebied. Daar is reeds gedurende Augustus begin met die verkoop van kaartjies en met die 72 wat teen R35 elk verkoop is, was dit ‘n reusesukses. Ds. Dirk van Dyk het die verrigtinge geopen.

‘n Hoendergereg, bykosse en slaaie is voorgesit. “Daar was ook ‘n ekstra tafel met ‘n ver-skeidenheid koek wat saam met tee geniet kon word en alles is uitverkoop,” sê Johan. Hierdie nuwe idee vir die aanbied van ‘n basaar het so-wat die helfte meer ingebring as vorige basaars wat aangebied is.

Hy bedank graag die volgende persone: Alle Pearly Beachers vir hul mildelike bydraes, (soms iets ekstra) en kaartjies wat gekoop is, die anonieme verskaffer van die eetgerei, Julie Roussouw en Maria Hoffman en hulle helpers vir die ete en organisering, Cecil vir die saalversiering, Jeff Pieterse vir die braaiery,  maar bo alles, alle eer aan ons Hemelse Vader vir sy oorvloed seëninge op die dag.