Is die God van die Ou Testament ‘n genadige God? 

Dit klink miskien na ‘n vreemde vraag, maar dit is tog so dat baie van ons aan Jesus as genadig dink, maar aan die God van die Ou Testament as ‘n God vol straf en oordeel.

As mens oor genade in die Ou Testament wil praat, is die belangrikste om eers die woorde te identifiseer wat in Afrikaans met genadig vertaal word en na hulle Hebreeuse betekenis te kyk, en dan natuurlik om na die Skrifgedeeltes se konteks te kyk waar die woorde voorkom. Die woorde wat ons met genadig vertaal, is volop en dan meestal verbind met ander beskrywende woorde wat ‘n refrein dwarsdeur die Ou Testament vorm.

Ek wil graag 2 tekste uit die bybel identifiseer. Die een is Eksodus 34 waar God aan Moses verskyn en Homself as ‘t ware aan Moses bekendstel: Terwyl Hy by Moses verbygaan, roep die Here: Ek die Here, is die barmhartige en genadige God, lankmoedig, vol liefde en trou.   (Eks 34: 6)

‘n Ander plek is daar waar Jona vir God kwaad is omdat Hy Nineve vergewe het en afgesien het van sy straf: . . . Ek het geweet U is ‘n genadige en barmhartige God, lankmoedig en vol liefde. U sien maklik af van die straf wat u aangekondig het. (Jona 4:2)

Die betekenis in Hebreeus is om iemand se guns te ontvang. ‘n Woord wat ook beter verstaan word as ons na die ander beskrywende woorde kyk wat daar rondom opgenoem word. Miskien is die Jona-verhaal dan ook ‘n goeie voorbeeld om na te kyk. Jona, wat lid is van God se volk, wat weghardloop omdat hy juis nie aan die Israeliete se vyande en bloed-dorstigste nasie van die dag God se Woord wil verkondig nie. Eers sal mens dink Jona hardloop weg omdat hy bang is vir die Assiriërs (Nineve was die hoofstad van die Assiriese Ryk) en met reg. Eers later kom ons agter Jona hardloop weg juis omdat hy God ken en weet dat God sal vergewe as die Nineviete berou toon en daarvoor sien hy nie kans nie. Hy deel nie sy genadige God met ander nie. Genade is wonderlik as ek dit ontvang, maar nie as my vyand ook dit moontlik kan ontvang nie. Jona se ontsteltenis maak juis die grootheid van God se genade weer sigbaar.

En hoe wyd is God se genade? Meer as genoeg vir Israel, meer as genoeg vir Assirië en meer as genoeg vir al die diere! Soos God self sê in die slotvers van die boek: Maar ek mag nie besorg wees oor die groot stad Nineve nie, ‘n stad waarin daar meer as honderd en twintig duisend mense is wat nie weet wat reg of verkeerd is nie, en ook nog baie diere? (Jona 4: 11)