Donderdagoggend 12 November  2015 het ‘n groep van die hulpwerkers in die kleinsaaltjie bymekaargekom om die jaar op gesellige wyse af  te sluit. Ds. Willie Kotze het daarop gewys dat God se menslikheid aan die wêreld verskyn het; daarom is ons mense. Ons gemeente kan nie sonder hulpwerkers en omgeepersone klaarkom nie. Hulle werk is van onskatbare waarde. Hulle verrig nie net diens as insamelaars van dankoffers met tuisbesoeke nie, maar dien ook op verskeie diensgroepe. Hulle gee om vir lidmate in sy of haar wyk, hulle is die “oë en ore” van die leraars en kerkraad. Tannie Bets van der Merwe is die oudste  hulpwerker. Sy is al 90 jaar en nog steeds aktief betrokke. Sy beoog wel om eersdaag af te skaal op haar hulpwerkertake. Dankie, Tannie Bets, vir al die jare se getroue diens! Hannes Cilliers het namens die Bediening Finansies en die gemeente sy dank en waardering aan die werkers oorgedra.

Ilse Klopper, leierdiaken, het ook haar dank uitgespreek. Soos gebruiklik is gesellig gekuier met ‘n koppie tee/koffie en ‘n eetdingetjie.